La Granouio que se vòu faire autant grosso que lou Buou

Joseph-Marius Diouloufet (1785 - 1840)

Uno Granouio au bord de l'aigo,
Assetado sus lou dougan
D'un clar o d'un pichot estan
Au bèu mitan dei bourtoulaigo,
Veguè veni à travès champ
Un Buou que semblavo uno couelo,
Qu'après avé bèn mastega
D'erbo, sènso èstre estoumaga,
S'aflatavo dou riau, ounte l'eigueto couelo,
Pèr li béure e pèr s'amaga.
Nouesto Granouio, à mita fouelo,
Quand lou veguè
Lèu s'alounguè,
E si diguè:
— M'es eisa de veni tant grosso !
Partè d'aqui pèr si gounfla.
Boufo que boufaras… semblavo un catenfla ;
Mai boufavo coumo uno rosso…
À la fin, s'enflè tant, paure ! que lou boufet,
Pèr tròu tesa la pèu, tout d'uno s'esclafè,
E li veguèron lei tripaio
S'espandi sus lou sòu emé la bourdifaio
Que li sourtié d'eici, d'eila…

Vaqui ço que gagnas quand vous sias tròu gounfla !
Se sabias quant n'avèn de Granouio à Marsiho,
Qu'escrivon franchiman, qu'escrivon prouvençau,
Que vouelon sa de libre, o que fan de journau
E de pèço de coumedìo ;
De rimaire de pacoutiho,
De marrits escrivan, de sa plen de sarrìo,
Que pèr sa soun pau e soun proun
Si gounflon coumo de baloun,
Pèr toumba pu tard en poutiho !
Vous taparias lou nas, leis uei e leis auriho
En viant seis estrambord ; quand crèton sènton mau…
Se mei vers, au jour d'uei, li van cerca garrouio,
Fau pas si crèire, au mens, que li a que de Granouio,
Car, dins aquéu mouloun, vous prouvariéu, bèn aut,
Que li manco pas de grapau.

La Grenouille qui veut se faire aussi grosse que le Boeuf