La Mule superbe Gilles Corrozet (1510 - 1568)
Ne s'eslever en orgueil
Plusieurs sont qui se mescognoissent
Se voyantz en prosperite,
Mais, s'ilz sonten adversite,
Leur infirmité recognoissent.
Quelque Mule grasse en bon poinct,
Bien nourrie d'orge en l'estable,
De rien ne se soulcioit point
Et ne portoit charge grevable ;
Sentant donc fortune amyable,
En son couraige se prisoit,
L'estimant tousjours favorable,
Et par orgueil ainsi disoit :
« Mon pere est ung tres beau Cheval,
Noble et puissant, plein de proesse,
Qui peult courir a mont, aval:
Je luy ressemble de vistesse. »
Peu aprés advint qu'en la presse
Des Chevaulx legiers fut menée,
Mais de courir bien tost feit cesse,
Quand la course luy fut donnée.
La Mule, clochant et deffaicte,
Dict en soymesme : « J'apperçoy
Qu'ung Asne m'a forgée et faicte,
Non ung Cheval, je le congoy :
D'aultrement penser me decoy,
Car ung Asne est mon propre pere.»
Bien souvent se retourne en soy
Qui perd la fortune prospere.
Titre original : De la Mule superbe
