Lou Loup e lou Chin

Joseph-Marius Diouloufet (1785 - 1840)

Un Loup pu maigre que Caremo,
Emai aguèsse ges de mestresso, de fremo,
E que passèsse pas lei nue
Dins lei tòti, lei tiatre e leis oustau de jue,
Rescontro un chin, un boulo-dògou
Tout d'uno pèço, gros, carra,
Gras à fèndre, coumo un curat !
Éu èro prim, pu sec qu'un bògou,
Leis oues li traucavon la pèu ;
Umble e soumés s'aflato d'éu,
E, lou flatié, lou coumplimento…
Disént que sa graisso lou tento ;
— Tendra qu'à vous, li dis lou Chin,
Se voulès carga de cousino
E de vous vèire, un jour, ansin,
Emé de graisso sus l'esquino.
Farés jamai rèn dins lei boues,
Mounte troubas que de racino...
Nautre rouigan de car e d'oues,
E lou pan a tròu de farino ;
Se voulès me segui, venès, vous menarai…
Lou Loup respouende : — Que farai ?
— Rèn ! dis lou Chin, farés la casso
Ei paure que pouerton la biaço ;
Jugarés emé leis enfant
Dou mèstre ; liparés lei man
Dei fremo, dei varlet, dei gènt de la bastido ;
S'avés lou mourre beisarèu,
En touteis agradarés lèu :
Lei caio toumbaran roustido !
Sènso n'en mai ausi, lou Loup seguis lou Chin ;
Quouro soun à mita camin,
Ves lou couele pela dou dògou ; sa ‘no pauvo.
— Qu'avès aqui ? li dis. — Es rèn. — Rèn !
— Pau de cauvo, La marco dou coulié. — Vous tènon estaca ?
Ouvejo ! dis lou Loup, mi disias tout-escap.
— Vous disiéu… vous disiéu…
Quand sias Chin, sias pas mèstre ;
Fau bèn un pau soufri, per avé lou bèn-èstre !
— Aquéu bounur d'aqui mi sa pas ges de gau,
Li replico lou Loup ; siéu pas d'aquéu calibre,
Vau mies de pan, en estènt libre,
Que de fricot, estènt esclau !
Avié resoun lou Loup. Quand fau clina l'esquino
E tirassa lou bast pèr gagna quàuquei sòu
A tiro pèu, tout lou fricassun de cousino
Es bèn luen de valé un bajan de faiòu.
Quand pèr sa bouhi la pignato
Fau s'embriga tout l'an e trima coumo un ai,
S'un mèstre regagnous vous tèn souto sa pato,
Vau-ti pas mies milo còup mai
De rousiga dins soun vilàgi
Un troues d'artoun mousi, en pleno liberta,
Em' un mousselet de froumàgi
Que d'ana viéure esclau, per èsse bèn trata ?
Ah ! s'aviés soulamen tres milo franc de rèndo,
Moun paure Roussignòu, istariés à Pouciéu,
E respoundriés ei gènt que ti metrien en vèndo :
Lei segnour e lei rèi soun mens urous que iéu !
Vous-autre, bouen pacan, en fouiènt vouéstei terro,
Avès, pèr vous nourri, de pan emé de vin,
E se vouésteis enfant vous disien : Paire, alin
À la vilo, sias pas coumo eicito, en galèro ;
Anen-li d'aquest pas ! Digas-li : Rampelin !
Tout lou mounde, à la vilo, es pas dins lou bèn-èstre,
Fau pas si crèire, au mens, que touei tèngon lou let :
À la vilo sariés varlet,
E dins toun vilàgi sies mèstre.

Le Loup et le Chien