Le Lion, l'Âne et le Renard Gilles Corrozet (1510 - 1568)
Se chastier par aultruy.
Plein de bon sens et bien saige est celluy
Qui fuyt d'aultruy la ruyne et cadence :
C'est une astuce et acte de prudence,
Se chastier par le peril d'aultruy.
Ung fier Lyon, ung Asne et ung Regnard
S'en vont chasser ensemble quelque part
En la forest branchée :
Tant ont chassé qu'ilz ont corné la prise,
Et, pour partir la proye ainsi surprise,
Elle fut detranchée.
L'Asne, qui trop d'audace s'aitribue,
A chascun deulx le butin distribue,
Dont le Lyon despit
Rugit et brait en sa fureur et ire,
Et l'Asne prend, le despece et dessire,
Sans luy donner respit.
Puts au Regnard bailla commission
De faire entr'eulx la distribution ;
Lors, par prudence caulte,
La moindre part a luy se reservant,
De la grand part fut le Lyon servant,
De paour de faire faulte.
« Qui t'a ainsi (dict le Lyon treux)
Faict sy sçavant, sy prudent, sy heureux ? »
Lors le Regnard parla,
Disant : « Le mal d'aultruy m'a enseigné,
Car j'avais paour d'estre ainsi empoigné
Que l'Asne que voyla. »
