La Vieille et ses Servantes Gilles Corrozet (1510 - 1568)
Cheoir d'ung peril en ungplus grand.
Qui veult fuyr et eviter le gouffre
De Caribdis, quand il vient prés de la,
Souvent il tumbe au gouffre de Silla,
Auquel plus grand danger et peril souffre.
Une vieille avait des servantes
Qu'elle esveilloit avant le jour ;
Le chant du Cog bien observantes,
Se levoient sans faire sejour.
Voyantz doncques ce fascheux tour
Et ce tres ennuyeux resveil,
Qui les excitoit du sommeil,
Dont le Cog chantait la vraye heure,
Dirent ensemble : « Il faut qu'il meure ! »
Lors, selon leur conclusion,
Du Cog feirent occision ;
Mais leur malice en vain labeure.
Ces chambrieres furent frustrées
De leur folle et vaine esperance ;
Elles furent mal rencontrées
De la maistresse qui les tance :
Car sans paix, repos ne constance,
Les esveille chascune nuict
Avec ung tumulte et grand bruict,
Et les faict plus matin lever.
Qui done yeult ung mal eschever
Par faict injuste et vicieux,
Chet en mal plus pernicieux
Qui d'avantaige peult grever.
